जापानकी राजकुमारी मिकासाको १०१ वर्षको उमेरमा निधन भएको छ। इम्पेरियल हाउसहोल्ड एजेन्सीका अनुसार, श्रीमती मिकासा (जसको जन्म नाम युरिको हो) को शुक्रबार बिहान निधन भएको हो। उहाँ स्वर्गीय सम्राट शोवाका कान्छो भाइ प्रिन्स मिकासाकी विधवा हुनुहुन्थ्यो।

श्रीमती मिकासाको स्वास्थ्यमा गत मार्चदेखि नै समस्या देखिएको थियो। स्ट्रोक र निमोनियाबाट पीडित भएपछि उहाँलाई टोकियोको सेन्ट ल्युक इन्टरनेशनल अस्पतालमा भर्ना गरिएको थियो। केही समयको उपचारपछि उहाँको स्वास्थ्यमा सुधार आएको थियो तर पछि पुनः बिग्रिएको थियो।

श्रीमती मिकासाले राजकुमार मिकासासँग ७५ वर्षसम्म विवाह जीवन बिताउनुभएको थियो। राजकुमार मिकासाको सन् २०१६ मा निधन भएको थियो। श्रीमती मिकासाको निधनसँगै जापानको शाही परिवारले अर्की वरिष्ठ सदस्य गुमाएको छ।