जापान कन्जरभेटिभ पार्टी (日本保守党) ले जापानमा बसोबास गर्ने विदेशी नागरिकहरूप्रति निकै कडा र विवादास्पद नीतिहरू अघि सारेको छ।

उनीहरूले “जापान पहिलो” भन्ने नारासहित आप्रवासनको विरोध गर्दै विदेशी कामदार र विद्यार्थीको संख्या घटाउनुपर्ने माग गरेका छन्। यसका साथै, पार्टीले अनावश्यक विदेशीहरूलाई स्वीकार नगर्ने, अवैध आप्रवासीहरूलाई पूर्णरूपमा शून्यमा झार्ने र उनीहरूलाई देश निकाला गर्न आप्रवासन नियन्त्रण तथा शरणार्थी पहिचान ऐन संशोधन गर्नुपर्नेमा जोड दिएको छ।

उनीहरूका अन्य मुख्य भनाइहरूमा विदेशी बासिन्दाका लागि छुट्टै स्वास्थ्य बीमा प्रणाली हुनुपर्ने, विदेशीहरूद्वारा जापानी कम्पनी वा जग्गा खरिदमा प्रतिबन्ध लगाउनुपर्ने, र जापानमा बस्ने विदेशीहरूले जापानी संस्कृतिको कडा रूपमा पालना गर्नुपर्ने कुराहरू समावेश छन्।
यो अति दक्षिणपन्थी र राष्ट्रियतावादी पार्टीका भनाइहरूले जापानमा विदेशीहरूप्रति भेदभाव र सामाजिक विभाजन बढाउन सक्ने चिन्ता व्यक्त गरिएको छ, जसलाई केही मानवअधिकार संगठनहरूले निन्दा गरेका छन्।