टोकियो, जापान: यस वर्षको सुरुमा शक्तिशाली भूकम्पबाट प्रभावित जापानको इशिकावा प्रिफेक्चरमा अहिले भारी वर्षाका कारण बाढी र पहिरोको उच्च खतरा उत्पन्न भएको छ। मौसमविद्हरूले शनिबार यस क्षेत्रका केही भागहरूमा मूसलधारे वर्षाको चेतावनी जारी गर्दै बासिन्दाहरूलाई सुरक्षित स्थानमा जान आग्रह गरेका छन्।
भूकम्पबाट अझै पुनर्निर्माणको क्रममा रहेका वाजिमा, सुजुका र नोटो सहरहरू सबैभन्दा बढी प्रभावित भएका छन्। यी सहरहरूमा बाढी र पहिरोको उच्च जोखिम रहेको भन्दै स्थानीय प्रशासनले ३० हजारभन्दा बढी बासिन्दाहरूलाई सुरक्षित स्थानमा सार्ने काम गरिरहेको छ।
जापानको मौसम एजेन्सीले यस क्षेत्रका लागि सबैभन्दा उच्च स्तरको आपतकालीन चेतावनी जारी गर्दै बासिन्दाहरूलाई तत्काल जीवन रक्षाका उपायहरू अपनाउन आग्रह गरेको छ। अधिकारीहरूले वर्षा जारी रहेसम्म अन्य क्षेत्रहरूमा पनि चेतावनी जारी हुन सक्ने बताएका छन्।
स्थानीय सञ्चार माध्यमका अनुसार यस प्रकोपमा परी कम्तिमा एक व्यक्ति बेपत्ता भएको छ। वाजिमा, सुजुका र अन्य प्रभावित क्षेत्रहरूबाट उद्धारका लागि लगातार अपील आइरहेका छन्। पहिरो गएका, घरहरू भत्किएका र मानिसहरू फसेका लगायतका घटनाहरूको खबर आइरहेको छ। उद्धारकर्ताहरूले फसेका मानिसहरूको खोजी कार्य तीव्र पारेका छन्।
सामाजिक सञ्जालमा बिहानै पोस्ट गरिएका तस्बिर र भिडियोहरूमा सडक र फुटपाथहरू बाढीको पानीले भरिएको देखिन्छ।
सम्बन्धित खवर
