जापानको मध्य क्षेत्रमा पर्ने नोटोमा गत सेप्टेम्बर २१ मा परेको अभूतपूर्व वर्षाका कारण निम्तिएको विपत्तिले अझै पनि स्थानीय बासिन्दाहरूलाई पिरोलीरहेको छ। एक महिना बितिसक्दा पनि हजारौं मानिसहरू आफ्नो घरबार गुमाएर आश्रयस्थलमा बस्न बाध्य छन्।
यस विपत्तिमा परी १४ जनाको मृत्यु भएको छ भने एक जना अझै बेपत्ता छन्। बाढी र पहिराले घरहरूमा व्यापक क्षति पुर्याएको छ भने खेतीयोग्य जमिन र सडकहरू पनि क्षतिग्रस्त भएका छन्। इशिकावा प्रिफेक्चरका अनुसार, अक्टोबर १८ सम्म ४३४ जनाभन्दा बढी व्यक्तिहरू वाजिमा, सुजु र नोटो सहरका आश्रयस्थलहरूमा आश्रित छन्। कम्तीमा १ हजार ४ सय ८७ घर डुबानमा परेका छन्।
यस विपत्तिले स्थानीय अर्थतन्त्रमा पनि ठूलो असर पारेको छ। कृषि, पर्यटन जस्ता क्षेत्रहरूमा ठूलो क्षति पुगेको छ। प्रभावित क्षेत्रका बासिन्दाहरूलाई पुनःस्थापना गर्नका लागि सरकार र विभिन्न संघसंस्थाहरूले राहत तथा पुनर्निर्माणका कामहरू गरिरहेका छन्। तर, अझै पनि धेरै काम बाँकी छ।
सम्बन्धित खवर
