१२ चैत्र/सोलुखुम्बु समाचार – सोलुखुम्बुको पर्यटकीय क्षेत्र नाम्चेमा सर्वाधिक नगद पुरस्कार राशीको भलिबल प्रतियोगिता हुने भएको छ । सगरमाथा दिवसको अवसर पारेर पाँच लाख पुरस्कार राशी भएको राष्ट्रिय पुरुष भलिबल प्रतियोगिता नाम्चे युवा समूहको आयोजनामा हुन लागेको हो ।
मे २० वाट शुरु हुने प्रतियोगिता सगरमाथा दिवसको दिन मे २९ मा समापन हुने कार्यक्रमका संयोजक लामाकाजी शेर्पाले जानकारी दिए । “सगरमाथको फेदि अनुपम छ ठाउँ, आन्तरिक पर्यटनको लागि नाम्चे घुम्न जाउँ” भन्ने नाराका साथ आयोजना हुन लागेको प्रतियोगितामा प्रथम स्थान प्राप्त गर्ने टिमले ५ लाख एक सय १ रुपैयाँ प्राप्त गर्नेछ ।
यस्तो द्वितीय र तृतीय स्थान प्राप्त गर्नेले क्रमशः ३ लाख १ सय १ र १ लाख १ सय १ रुपैयाँ प्राप्त गर्नेछन् । प्रतियोगिताको उत्कृष्ट खेलाडीलाई ५० हजार १०१ नगद पुरस्कार प्रदान गरिनेछ । संयोजक शेर्पाका अनुसार एक टिममा दुई जना भन्दा बढी राष्ट्रिय खेलाडी सम्लग्न हुन पाउने छैनन् । प्रवेश शुल्क १० हजार रुपैयाँ लाग्ने प्रतियोगिता हिमालय आधारभूत विद्यालय नाम्चेको खेल मैदानमा सञ्चालन हुनेछ ।
खेल समापनका अवसरमा सांगीतिक कार्यक्रम समेत आयोजना हुने बताइएको छ ।
